នាម
នាម គឺជាពាក្យសម្ដែងឲ្យមនុស្ស សត្វ រុក្ខជាតិ ទីកន្លែង និងស្ថានភាពបែបណាមួយ។
នាម មានប្រាំបីប្រភេទគឺ:
- សាធារណនាម ឬនាមសាធារណ៍
- អសាធារណនាម ឬនាមអសាធារណ៍
- នាមករណ៍ ឬករណនាម
- នាមការណ៍ ឬការណ៍នាម
- ជីវចល និង អជីវចល
- អរូបី និងរូបី
សាធារណនាម ឬនាមសាធារណ៍ គឺជានាមសម្ដែងមិនចំពោះ ទូទៅ។
ឧទាហរណ៍:
- លោកតា ជិះកង់ទៅផ្សារទិញបន្លែផ្លែឈើ ។
- សិស្សានុសិស្ស រត់លេងក្នុងសួន។
- គោ ស៊ីសៅ្មឯវាលស្រែ ។
អសាធារណនាម ឬនាមអសាធារណ៍ ជានាមសម្ដែងឈ្មោះប្រាកដ ចំពោះ មិនទូទៅ។
ឧទាហរណ៍:
- ណាវី បានជូននំចំណីទៅដល់តាសុខ ។
- តាសាននាំអាពាលទៅរកសត្វ ឯព្រៃភ្នំខ្សាច់ស ។
ការកនាម ឬនាមការក៍ ជាពាក្យសម្ដែងអ្នកធ្វើអំពើ ឬអ្នកមានសភាពលក្ខណ:បែបណាមួយ ។
ឧទាហរណ៍:
អ្នកភ្ជួរ អ្នករាស់ អ្នករែកកណ្ដាប់ អ្នកស្ទូង បំពេញភារកិច្ចរៀងៗខ្លួនយ៉ាងសកម្ម ។
ករណនាម ឬនាមករណ៍ គឺជានាមសម្ដែងសភាព ឬសកម្មភាព។
- នាមករណ៍កើតឡើងដោយវិធីបន្ថែមដើម និងបន្ថែមចុង
- ពាក្យបន្ថែមដើម : ការ សេចក្ដី ភាព
ឧទាហរណ៍ : ការ + បង្រៀន (កិ) > ការបង្រៀន
ភាព + ថ្លៃថ្នូរ (គុ) > ភាពថ្លៃថ្នូរ
សេចក្ដី + ល្អ (គុ) > សេចក្តីល្អ
នាមរូបី គឺជានាមសម្រាប់សម្គាល់ឈ្មោះ មនុស្ស សត្វ វត្ថុ ទីកន្លែង ដែលយើងអាចដឹងបាន ដោយវិញាណទាំងប្រាំ ។
ឧទាហរណ៍: កៅអី សាលារៀន កាបូប ជញ្ជាំង
នាមអរូបី គឺជានាមសម្គាល់ឈ្មោះអ្វី ដែលគ្មានរូបរាងច្បាស់លាស់ ហើយមនុស្សមិនអាចប៉ះ
ពាល់ឬមើលឃើញ តាមរយៈកាយវិញ្ញាណ ឬចក្ខុវិញ្ញាណបានឡើយ។
ឧទាហរណ៍: ភាពស្មោះត្រង់ ការយោគយល់…។ល។
នាមជីវចល គឺជានាមសម្រាប់សម្គាល់ឈ្មោះមួយដែលមានជីវិតពីធម្មជាតិដូចជានាមសម្រាប់
សម្គាល់ឈ្មោះមនុស្ស សត្វ និងរុក្ខជាតិ។
នាមអជីវចល គឺជានាមសម្រាប់សម្គាល់ឈ្មោះអ្វីមួយដែលមានជីវិតគ្មានវិញ្ញាណដូចជានាមសម្គាល់ឈ្មោះ វត្ថុ ទីកន្លែង ស្ថានភាព សកម្មភាព និងគំនិតអ្វីមួយ។
ឯកសារយោង
- http://www.khsearch.com/qna/2505
- http://sokna70khmer.weebly.com/603560706040.html
- ភាសាខ្មែរថ្នាក់ទី ៨ ក្រសួងអប់រំ យុវជន និងកីឡា បោះពុម្ពលើកទី ៧ ឆ្នាំ ២០១៦ នាម និងប្រភេទនាម ទំព័រ ១៩៧